ក្រុមហ៊ុនផលិតរថយន្ត និងម៉ូតូអគ្គិសនី VinFast របស់វៀតណាម បានបញ្ចេញរបាយការណ៍កាលពីថ្ងៃពុធម្សិលមិញ ដោយបង្ហាញថាខ្លួនលក់ម៉ូតូអគ្គិសនីបានចំនួនជាង ១២ម៉ឺនគ្រឿង ក្នុងត្រីមាសទី៣ឆ្នាំនេះ ស្មើនឹងកំណើន ៧៣% ធៀបនឹងរយៈពេលដូចគ្នាកាលពីឆ្នាំ២០២៤។ ហើយបើសរុបចំនួនលក់ក្នុងរយៈពេល ០៩ខែដំបូងនៃឆ្នាំ២០២៥ ពួកគេលក់ម៉ូតូអគ្គិសនីបានចំនួន ២៣៤.៥៣៦គ្រឿង ស្មើកំណើនដល់ទៅ ៤៨៩% ធៀបរយៈពេលដូចគ្នាកាលពីឆ្នាំមុន។ 

កំណើនលក់នេះមិនមែនបណ្ដាលមកពីហេតុផលទីផ្សារខ្លួនវានោះទេ ប៉ុន្តែវាកើតឡើងតាមគោលនយោបាយរបស់រដ្ឋាភិបាលវៀតណាម ដែលចង់កាត់បន្ថយការប្រើប្រាស់យានយន្តប្រើប្រេងសាំង រួចជំនួសមកវិញដោយយានយន្តអគ្គិសនី។ រដ្ឋបាលទីក្រុងហាណូយបានប្រកាសផែនការហាមឃាត់ការប្រើប្រាស់ម៉ូតូប្រើសាំង ចាប់ពីពាក់កណ្ដាលឆ្នាំ២០២៦ ទៅ។ រដ្ឋាភិបាលវៀតណាមនឹងបន្តពង្រីកការហាមឃាត់នៅទីក្រុងធំៗផ្សេងទៀតនៅទូទាំងប្រទេស ត្រឹមឆ្នាំ ២០២៨ ខាងមុខ។ 

យ៉ាងណាមិញ ការប្រែប្រួលនេះហាក់ហុចឱកាសយ៉ាងធំដល់ក្រុមហ៊ុន VinFast របស់មហាសេដ្ឋីមានជាងគេនៅវៀតណាម លោក Pham Nhat Vuong តាមរយៈការដណ្ដើមយកចំណែកទីផ្សាររថយន្តអគ្គិសនីនៅក្នុងប្រទេសរបស់ខ្លួន ពីក្រុមហ៊ុនជប៉ុនរួមមាន Honda, Yamaha និង Suzuki ដែលបានកាន់កាន់ទីផ្សារម៉ូតូនៅវៀតណាមអស់រយៈពេលជាយូរមកហើយ។ 

ទីភ្នាក់ងារព័ត៌មាន Reuters បានរាយការណ៍កាលពីថ្ងៃអង្គារសប្ដាហ៍នេះថា រដ្ឋាភិបាលជប៉ុន និងក្រុមហ៊ុនផលិតម៉ូតូរបស់ជប៉ុនបានព្រមានតវ៉ាប្រទេសវៀតណាមថា ផែនការហាមឃាត់ម៉ូតូប្រើសាំងនៅទីក្រុងហាណូយ នឹងអាចបង្កឱ្យមានការបាត់បង់ការងារនៅតាមរោងចក្រ និងបង្កការរំខានដល់ទីផ្សារម៉ូតូក្នុងប្រទេសវៀតណាម។ ស្ថានទូតជប៉ុន និងសមាគមអ្នកលក់ម៉ូតូនៅវៀតណាម បានជំរុញឱ្យអាជ្ញាធរអនុវត្តផែនការប្ដូរទៅប្រើប្រាស់យានយន្តអគ្គិសនីជាដំណាក់កាល ដោយទុកពេលវេលាសម្រាប់ពួកគេរៀបចំខ្លួន។

តាមរបាយការណ៍របស់រដ្ឋាភិបាលវៀតណាមបង្ហាញថា ក្នុងចំណោមប្រជាជនវៀតណាមទាំង ១០០លាននាក់ មាន ៨០% ប្រើប្រាស់ម៉ូតូ ខណៈទំហំទីផ្សារម៉ូតូនៅប្រទេសនេះត្រូវបានរាយការណ៍ថា មានតម្លៃ ៤,៦ពាន់លានដុល្លារ ត្រឹមឆ្នាំ២០២៥នេះ។ មកទល់បច្ចុប្បន្ន ចំណែកទីផ្សារធំកំពុងកាន់កាប់ដោយក្រុមហ៊ុនជប៉ុន Honda ប៉ុន្តែបន្ទាប់ពីមានការហាមខាត់ម៉ូតូប្រើសាំង ទីផ្សារនឹងអាចត្រូវបានប្រជែងដោយក្រុមហ៊ុនផ្សេង។ 

ដោយឡែកចំពោះការលក់រថយន្តអគ្គិសនីរបស់ក្រុមហ៊ុន VinFast ក៏សម្រេចបានកំណើនដូចម៉ូតូដែរ។ ក្នុងរបាយការណ៍ដដែល ក្រុមហ៊ុននេះបានឲ្យដឹងថា ក្នុងត្រីមាសទី៣កន្លងទៅ ខ្លួនលក់រថយន្តបានចំនួន ៣៨.១៩៥គ្រឿង ហើយបើសរុបរយៈពេល ០៩ខែដំបូងឆ្នាំនេះ ពួកគេលក់រថយន្តបានចំនួន ១១០.៣៦២គ្រឿង។ តាមផែនការសម្រាប់ឆ្នាំ ២០២៥ ក្រុមហ៊ុន VinFast បានដាក់គោលដៅលក់រថយន្តរបស់ខ្លួនឲ្យបាន ២០ម៉ឺនគ្រឿង៕