រដ្ឋាភិបាលម៉ាឡេស៊ី បានអនុម័តថវិកាចំនួន ១៥០០លានរីងហ្គីត (៣៥០លានដុល្លារអាមេរិក) សម្រាប់សាងសង់របងសុវត្ថិភាពប្រវែង ៥០គម តាមព្រំដែនជាប់ប្រទេសថៃ ដើម្បីទប់ស្កាត់ឧក្រិដ្ឋកម្មឆ្លងដែន។ នេះបើតាមការចុះផ្សាយរបស់កាសែតម៉ាឡេស៊ី Bernama កាលពីថ្ងៃអង្គារម្សិលមិញ។ 

របងព្រំដែននេះ នឹងត្រូវបានសាងសង់នៅចំណុចបឹង Golok នៃរដ្ឋ Kelantan របស់ម៉ាឡេស៊ី ជាប់ព្រំដែនខេត្ត Narathiwat របស់ថៃ។ បច្ចុប្បន្នគម្រោងខាងលើ គឺកំពុងស្ថិតក្នុងដំណាក់កាលដេញថ្លៃជ្រើសរើសក្រុមហ៊ុនសាងសង់។ 

លោក Datuk Mohd Yusoff Mamat មេប៉ូលីសនៃរដ្ឋ Kelantan បាននិយាយថា ទម្រង់ភូមិសាស្រ្តពុះចែកព្រំដែនរវាងប្រទេសទាំងពីរត្រង់ទន្លេ Golok គឺជាតំបន់តូចចង្អៀត និងមានទឹករាក់ ធ្វើឱ្យការគ្រប់គ្រងសន្តិសុខព្រំដែនពិបាកក្នុងការអនុវត្តជាងតំបន់ព្រំដែនដទៃទៀត បើទោះបីជាមានជំនួយពីបច្ចេកវិទ្យាទំនើបដូចជា បញ្ញាសិប្បនិម្មិត AI ដ្រូន ឬកាមេរ៉ាក៏ដោយ។

ក្រៅពីសាងសង់ក្នុងបំណងការពារសកម្មភាពខុសច្បាប់ រាប់ចាប់ពីការលួចឆ្លងដែន រត់ពន្ធទំនិញ និងលំហូរគ្រឿងញៀន របងព្រំដែននេះក៏អាចដើរតួជារនាំងការពារទឹកជំនន់ផងដែរ។ 

សូមជម្រាបថា ម៉ាឡេស៊ី-ថៃ មានព្រំដែនជាប់គ្នាប្រវែងសរុបប្រមាណ ៦០០គម ហើយក្នុងនោះមានប្រវែងប្រហែល ១០០គម ខណ្ឌចែកដោយទន្លេ Golok៕