នៅថ្ងៃពុធទី ២៣ ខែកក្កដានេះ ប្រទេស​ថៃ​បាន​បង្កើន​ការធ្វើសកម្មភាពរុញទំនាស់ជាមួយកម្ពុជាឲ្យកាន់តែក្ដៅបន្ថែមទៀត តាមរយៈការប្រើប្រាស់ឧប្បត្តិហេតុ​ផ្ទុះគ្រាប់​មីន​នៅ​តំបន់​ព្រំដែន​ ដើម្បីកោះ​ហៅ​ឯកអគ្គរដ្ឋទូត​របស់​ខ្លួន​ពី​ទីក្រុង​ភ្នំពេញ និង​បណ្ដេញ​អគ្គរដ្ឋទូតខ្មែរចេញពីទីក្រុងបាងកកដូចគ្នា។ នេះបើតាមសេចក្ដីរាយការណ៍ដោយបណ្ដាញផ្សព្វផ្សាយធំៗនៅស្រុកថៃ។

សកម្មភាពនេះធ្វើឡើងដោយនាយករដ្ឋមន្ត្រីស្តីទីរបស់ថៃ លោក Phumtham Wechayachai មកពីគណបក្សភឿថៃ ដែលជាបុគ្គល និងអ្នកនយោបាយកំពុងមានជម្លោះជាមួយមេដឹកនាំកម្ពុជា។ ការទម្លាក់ទំនាក់ទំនងការទូតដូច្នេះ នឹងធ្វើឲ្យការប្រឹងប្រែងអស់រយៈពេលរាប់ឆ្នាំកន្លងមកដើម្បីជំរុញពាណិជ្ជកម្ម ការដោះស្រាយវិវាទព្រំដែន និងកិច្ចសហប្រតិបត្តិការផ្សេងទៀតរវាងប្រទេសទាំងពីរ ប្រែក្លាយជាគ្មានន័យ និងខាតបង់។ 

សូមជម្រាបថា ការសម្រេចទម្លាក់ទំនាក់ទំនងការទូតធ្វើឡើងដោយភាគីថៃនេះ គឺកើតមានបន្ទាប់​ពី​មានទាហាន​ថៃ​ម្នាក់​ទៀត​ បានជាន់គ្រាប់មីនផ្ទុះ​បណ្ដាលឲ្យដាច់​ជើង​ស្តាំ ​នៅក្នុង​តំបន់​ជម្លោះ Huai Bon ​ក្នុង​ខេត្ត Ubon Ratchathani។ ឧបទ្ទវហេតុនេះបានកើតឡើងនៅម៉ោងប្រហែល ៤:៥៥ នាទីល្ងាច ថ្ងៃទី២៣ កក្កដានេះ។ 

គួររំលឹកដែរថា លោក Phumtham ដែលមានតួនាទីជាឧបនាយករដ្ឋមន្ត្រី និងជារដ្ឋមន្ត្រីមហាផ្ទៃស្តីទីផងនោះ កាលពីពេលថ្មីៗនេះបានគំរាមជាច្រើនករណីលើកម្ពុជា បន្ទាប់ពីរដ្ឋាភិបាលថៃ និងរដ្ឋាភិបាលកម្ពុជាកើនមានទំនាស់ជាមួយគ្នា ក្រោយបែកធ្លាយសារសន្ទនារវាងលោកស្រីនាយករដ្ឋមន្ត្រីព្យួរតំណែង Paetongtan និងសម្តេចតេជោ ហ៊ុន សែន។ ការគំេរាមនោះក៏មានការហៅឯកអគ្គរដ្ឋទូត​របស់​ខ្លួនទៅស្រុកវិញ  និងការសង់របងបិទប្រាសាទក្នុងតំបន់មានជម្លោះផងដែរ។ 

ដោយឡែកក្រុមយោធា ផ្អែកលើហេតុផលទាហានរបស់ខ្លួនជាន់មីនកាលពីល្ងាចមិញដូចគ្នា លោក Boonsin Padklang មេបញ្ជាការភូមិភាគទី២ថៃ បានប្រកាសថាចាប់ទីថ្ងៃទី ២៤ កក្កដាស្អែកទៅ ខ្លួននឹងចាត់វិធានការនានាដើម្បីឆ្លើយតបកម្ពុជាវិញ ដោយអះអាងថាគ្រាប់មីនដែលផ្ទុះនោះជាគ្រាប់ទើបដាក់ថ្មី និងចោទថាកម្ពុជាជាអ្នកដាក់។ 

វិធានការដែលមេបញ្ជាការភូមិភាគទី២ថៃរូបនេះគ្រោងអនុវត្តនៅថ្ងៃស្អែក រួមមានការបិទច្រកព្រំដែនចំនួនបួន គឺច្រក Chong An Ma, Chong Sa Ngam, Chong Chom និងច្រក Chong Sai Taku ព្រមទាំងបិទការធ្វើដំណើរការចូលទៅកាន់ប្រាសាទតាមាន់ធំ និងប្រាសាទតាក្របី។

ឆ្លើយតបនឹងការចោទប្រកាន់ខាងលើ ភាគីកម្ពុជាបានបដិសេធថាខ្លួនមិនបានដាក់មីនថ្មី និងរំលោភកិច្ចព្រមគ្រៀងអន្តរជាតិស្ដីពីគ្រាប់មីនប្រឆាំងមនុស្សឡើយ។ គិតត្រឹមល្ងាចថ្ងៃពុធ ទី២៣ កក្កដានេះ រដ្ឋាភិបាលកម្ពុជាពុំទាន់ឆ្លើយតបចំពោះរដ្ឋាភិបាល និងក្រុមយោធាថៃ ដែលទើបបានប្រកាសទម្លាក់ទំនាក់ទំនងការទូត និងបិទប្រាសាទចំនួនពីរខាងលើ នៅឡើយទេ៕