ក្រុមហ៊ុនផលិតរថយន្តរបស់វៀតណាម VinFast កើនប្រាក់ចំណូលទ្វេដង ដល់ ១២៤៦លានដុល្លារ ក្នុងរយៈពេល៦ខែដំបូងឆ្នាំ២០២៥នេះ ប៉ុន្តែនៅបន្តខាតចំនួន ១៤៣៨លានដុល្លារ ក្នុងរយៈពេលទន្ទឹមគ្នា។ ក្នុងរបាយការណ៍របស់ក្រុមហ៊ុនវៀតណាមចុះបញ្ជីក្នុងផ្សារហ៊ុនអាមេរិក Nasdaq ខាងលើ បានបង្ហាញថា គិតត្រឹមពាក់កណ្ដាលឆ្នាំ២០២៥ ក្រុមហ៊ុន VinFast សម្រេចបានកំណើនប្រាក់ចំណូល ៩២% ស្មើទឹកប្រាក់សរុបចំនួនជិត ៣៣ទ្រីលានដុង ឬស្មើប្រហែល ១២៤៩លានដុល្លារអាមេរិក។ កំណើននេះជំរុញដោយចំនួនលក់កើន ៣ដងធៀបនឹងរយៈពេលដូចគ្នាកាលពីឆ្នាំ២០២៤ ស្មើនឹង ៧២១៦៧គ្រឿង។

ប៉ុន្តែទន្ទឹមពេលសម្រេចបានកំណើននេះ VinFast បានខាតចំនួន ៣៨ទ្រីលានដុង ស្មើនឹង ១៤៣៨លានដុល្លារ ពោលចំនួនខាតមានច្រើនជាងប្រាក់ចំណូលរបស់ក្រុមហ៊ុនខាងលើទៅទៀត ក្នុងឆមាសដំបូងឆ្នាំនេះ ខណៈបើគិតចំនួនខាតបង្គររាប់ពីពេលបើកដំណើរការកាលពីឆ្នាំ២០១៧ ដល់ខែមិថុនាឆ្នាំ២០២៥ ការខាតបង់បង្គរ ឬ Accumulated Losses របស់ VinFast កើនដល់ ៣០៦ទ្រីលានដុង ស្មើប្រហែល ១១៥៧៩លានដុល្លារ។ 

គួរជ្រាបថា ក្រុមហ៊ុនផលិតរថយន្តរបស់វៀតណាមខាងលើ កាលពីខែមុនទើបបានបើកដំណើរការរោងចក្រនៅក្រៅប្រទេសដំបូងរបស់ខ្លួននៅប្រទេសឥណ្ឌា ដែលមានសមត្ថភាពផលិតបាន ៥ម៉ឺនគ្រឿងក្នុងមួយឆ្នាំ។ កាលពីខែមិថុនាឆ្នាំនេះ ក្រុមហ៊ុន VinFast ក៏បានបើកដំណើរការរោងចក្រទីពីររបស់ខ្លួននៅវៀតណាម ដែលមានសមត្ថភាពផលិតបាន ២០ម៉ឺនគ្រឿងក្នុងមួយឆ្នាំផងដែរ។ 

សម្រាប់ VinFast បច្ចុប្បន្ននៅបន្តពឹងលើទីផ្សារវៀតណាមដែលជាទីផ្សារកំណើតរបស់ខ្លួន ស្របពេលទីផ្សាររថយន្តអន្តរជាតិកាន់តែពិបាកប្រជែង។ ក្រុមហ៊ុននេះបាន និងកំពុងព្យាយាមបង្កើនចំនួនលក់ ឲ្យអ្នកប្រើប្រាស់ទូទៅនៅវៀតណាមផង និងជំរុញការលក់តាមរយៈក្រុមហ៊ុនរួមសម្ព័ន្ធរបស់ខ្លួនផង ត្បិត VinFast ជាអាជីវកម្មមួយរបស់ VinGroup ដែលជាកម្មសិទ្ធិរបស់មហាសេដ្ឋីមានជាងគេនៅវៀតណាម លោក Pham Nhat Vuong។ ជាក់ស្តែងកាលពីឆ្នាំ២០២៣ លោក Vuong បានបើកដំណើរការក្រុមហ៊ុនតាក់ស៊ី GSM ឬ Xanh SM ហើយមកទល់បច្ចុប្បន្ន ក្រុមហ៊ុន Xanh SM កំពុងប្រើប្រាស់រថយន្ត និងម៉ូតូអគ្គិសនីរបស់ក្រុមហ៊ុន VinFast សម្រាប់ប្រតិបត្តិការសេវាដឹកជញ្ជូនរបស់ខ្លួនទាំងនៅវៀតណាម ហ្វីលីពីន ឥណ្ឌូនេស៊ី និងនៅប្រទេសឡាវ ហើយក្រុមហ៊ុនតាកស៊ីនេះក៏ធ្លាប់ស្នើប្រតិបត្តិការនៅប្រទេសកម្ពុជាផងដែរ។ នេះមានន័យថា លោក Vuong ប្រើយុទ្ធសាស្ត្របង្កើតក្រុមហ៊ុន Xanh SM សម្រាប់ប្រតិបត្តិសេវាតាក់ស៊ី ប៉ុន្តែក្នុងពេលទន្ទឹមគ្នា ក៏ដើម្បីជំរុញចំនួនលក់រថយន្តរបស់ VinFast។ 

ទោះជាយ៉ាងណាក៏ដោយ ក្រោយដំណើរការបាន ៨ឆ្នាំមកនេះ VinFast នៅបន្តចំណាយខាតរាប់ពាន់លានដុល្លារក្នុងមួយឆ្នាំ ពោលមិនទាន់សម្រេចបានចំណុចរួចដើម និងបង្កើតប្រាក់ចំណេញនៅឡើយទេ ថ្វីបើប្រាក់ចំណូលបង្តកើនឡើងក៏ដោយ។ កាលពីឆ្នាំមុន លោក Vuong ត្រូវបានអ្នកកាសែតសួរអំពីរយៈពេលដែល VinFast អាចស៊ូបន្តដំណើរការទាំងខាតក្នុងចំនួនដ៏ច្រើនបែបនេះដល់ពេលណា។ មហាសេដ្ឋីរូបនេះឆ្លើយថា លោកនឹងបន្តគាំទ្រ VinFast ឲ្យបន្តដំណើរការទៅមុខរហូតទាល់តែលោកអស់លុយ។ 

ចាប់ពីឆ្នាំ២០២៣ ដល់ឆ្នាំ២០២៥ លោក Vuong បានបន្ថែមលុយផ្ទាល់ខ្លួនចំនួន ៥០ទ្រីលានដុង ស្មើប្រហែល ១៩០០លានដុល្លារអាមេរិកចូលក្នុងក្រុមហ៊ុន VinFast ដើម្បីឲ្យក្រុមហ៊ុននេះបន្តដំណើរការបានទាំងខាត។ ក្នុងផែនការលក់សម្រាប់ឆ្នាំនេះ VinFast ដាក់គោលដៅលក់រថយន្តឲ្យបាន ២០ម៉ឺនគ្រឿងនៅទីផ្សារវៀតណាម ហើយបើសម្រេចបានចំនួនលក់នេះ នោះ VinFast​ នឹងអាចសម្រេចបានចំណុចរួចដើម ត្រឹមឆ្នាំ២០២៥។ នេះបើតាមខ្លឹមសារកិច្ចប្រជុំប្រចាំឆ្នាំរបស់ VinFast ដែលរៀបចំឡើងកាលពីខែមេសា។ 

ភាគហ៊ុនរបស់ VinFast ដែលកំពុងត្រូវបានជួញដូរក្នុងផ្សារហ៊ុនអាមេរិក Nasdaq ធ្លាក់ថ្លៃមកនៅ ៣,២២ដុល្លារប៉ុណ្ណោះក្នុងមួយហ៊ុន ជាមួយតម្លៃទីផ្សារសរុបចំនួន ៧៥៣១លានដុល្លារ៕